ఇంగ్లీషు కవిత: చీకట్లో పాటల పక్షి

మూలం : థామస్ హార్డీ
అనువాదం : చింతకుంట్ల సంపత్ రెడ్డి

నేను…

దట్టంగా లతలు, దుబ్బులు పెరిగి ఉన్న

ఓ గేటుకు అనుకుని నిలబడి ఉన్నాను.

నీరసించిపోతున్న పగటి కంటిలో

బూడిద రంగు దెయ్యంలా కనపడుతున్నది… మంచు.

శీతాకాలపు గురుతులు విచారం నింపినవి.

విరిగిపోయిన వీణతీగల్లా పైకి ఎగసిన లతల రెమ్మలు

ఆకాశాన్ని చీలుస్తున్నవి.

దెయ్యం పట్టిన ఆ వేళ… ఇరుగుపొరుగు వారందరూ

తమ ఇళ్లల్లో… నెగళ్ల శరణుజొచ్చారు.

ప్రస్పుటంగా… ఆ భూమి రూపం

కాళ్ళు చేతులు చాచి పడి ఉన్న శవంలా ఉంది

మబ్బులు నిండిన ఆకాశం అతని శవపేటికలా రూపుదాల్చింది

గాలి… అతని మరణ గీతికలా వీస్తున్నది.

సృష్టి, పుట్టుకల పురాతన జీవశక్తి కృశించి, నిర్జీవమైంది

భూమ్మీద ప్రాణులన్నీ నావలెనే ఉత్సాహం మందగించి ఉన్నాయి.

అంతలోనే… ఒక్కసారిగా ఎండిన పైకొమ్మల్లో నుండి

ఓ మధురమైన స్వరం వినిపించింది.

అపరిమితమైన ఆనందంతో నిండిన

ఒక సాయంకాలపు ప్రార్థన గీతంలా అది కొనసాగింది.

చెదిరిన ఈకలతో, వయసు పైబడి, బలహీనమైన, సన్నని, చిన్నని పక్షి ఒకటి

తన ఆత్మను పూర్తిగా అర్పిస్తూ…

పెరిగిపోతున్న ఆ చీకటిలోకి తన గానాన్ని విసిరింది.

దూరంలో గాని, దగ్గర్లో గాని… ఈ భూమండలంలోనే

అంతటి అమందానందమైన భక్తి గీతాలను రాసేందుకు

కారణమేమీ అంతుచిక్కలేదు.

కానీ… సంతోషకరమైన ఆ రాత్రి వీడ్కోలు పాటలో

ఆశీర్వదించబడిన ఆశ ఏదో దాగివుందని నేను అనుకున్నాను.

దాని గురించి ఆ పక్షికి తెలుసు

కానీ… నేనే గ్రహించలేకపోయాను.

చింతకుంట్ల సంపత్ రెడ్డి

73 ఏళ్ల సంపత్ రెడ్డి ఎం.ఏ (హిస్టరీ), ఎం.ఏ (ఇంగ్లిష్), పి.జి.సి.టి.ఐ (CIEFL) చదివారు. సాంకేతిక విద్యాశాఖలో ఇంగ్లిష్ లెక్చరర్ గా చేసి… 2011 లో హెడ్ ఆఫ్ జనరల్ సెక్షన్ గా రిటైరయ్యారు. పుస్తకాలు చదవడం, అనువాదాలు చేయడం, ఫోటోగ్రఫీ ఆయన వ్యసనాలు
అత్యధికంగా అమ్ముడయే గ్రామర్ పుస్తకాల్లో ఒకటైన English Grammar Fundas (తెలుగు వివరణలతో) ప్రచురించారు. అనువాదాలు.. 1. మనుబెహన్ గాంధీ రచన బాపు-నా మాతృమూర్తి, 2. భిన్న దేశాల విభిన్న ఉత్తరాలు-ఉపన్యాసాలు (32 ఉత్తరాలు-32 ఉపన్యాసాల సంకలనం) 3. భిన్న దేశాల విభిన్న కవిత్వం (అనువాద కవితల సంకలనం) 4. హిందువులకో ఉత్తరం- లియో టాల్స్టాయ్ 5. సామ్యవాదం నుండి సర్వోదయ వరకు- లోక్ నాయక్ జయప్రకాశ్ నారాయణ్ వెలువడ్డాయి.
ఫోటోగ్రఫీ ఆసక్తి: తెలుపునలుపు ఛాయాచిత్రపు రోజుల్లో ఏతావాతా తీసిన ఫోటోలు కొన్ని భారతదేశంలోని అంతర్జాతీయ ఫోటోగ్రఫీ ఎగ్జిబిషన్స్ లో ప్రదర్శితమయ్యాయి. 1982 లో ఫెడరేషన్ అఫ్ ఇండియన్ ఫోటోగ్రఫీ (FIP) వారు నెలనెలా నిర్వహించిన మెంబర్స్ మంత్లీ కాంపిటేషన్ ‘బిగినర్స్ సెక్షన్’ ఫోటో పోటీలో “గ్రాండ్ అవార్డ్” (సిల్వర్ మెడల్) అవార్డు. 1984 లో ‘Decade of the Girl Child (1975-85) కార్యక్రమాల్లో భాగంగా UNICEF నిర్వహించిన Focus on the Girl Child ఫోటో పోటీలో 2200 మంది ఫోటోగ్రాఫర్లు పంపిన 6500 చిత్రాలలో మొత్తం 150 చిత్రాలు ఎంపిక కాగా, నా చిత్రాలు మూటికి మూడు (3) “గ్రాండ్ జ్యూరి అవార్డ్” గెలుచుకున్నాయి. అక్టోబర్, 2025 లో ప్రపంచ వన్యప్రాణి సంస్థ (WWF), తెలంగాణా అటవీశాఖ సంయుక్తంగా నిర్వహించిన ఫోటోగ్రఫీ పోటీలో రెండవ బహుమతి.