మా గురించి..

‘కథావసుధ’ ఎందుకు?

రకరకాల కారణాల నేపథ్యంలో తెలుగులో పత్రికల ప్రచురణ తగ్గిన, ఆగిన తరువాత ఆ లోటును అనేక ఆన్‌లైన్ పత్రికలు చక్కగా భర్తీ చేస్తున్నాయి. సాంకేతికత కొత్త పుంతలు తొక్కుతుండడం వల్ల సాహిత్యానికి జరుగుతున్న మంచి పరిణామం ఆన్‌లైన్ పత్రికలు. పోటీపడి నడుపుతున్న పత్రికలు కావు ఇవి. కేవలం సాహిత్యం కోసం నడుస్తున్న పత్రికలు. వీటిలో చాలా వరకు ఉచితంగానే పాఠకులకు అందుతున్నాయి. ఈ రంగంలోకి కొత్తవి రావడం.. ఎవ్వరి ‘మార్కెట్’నూ దెబ్బతీసే అవకాశం లేదు. చదివేవాళ్లు అన్నింటినీ చదువుకుంటారు. అందుకే తెలుగు సాహిత్యానికి ప్రచురణల పరంగా కొత్తగా ఏర్పడుతున్న లోటును భర్తీ చేయడానికి జరుగుతున్న అనేకానేక కొత ప్రయత్నాల్లో.. మా ప్రయత్నం kathavasudha.com కూడా ఒకటి.

‘కథావసుధ తెలుగు అనువాద సాహిత్య మాసపత్రిక’ కేవలం అనువాద కథలు, అనువాద కవితలు, సాహిత్య వ్యాసాలకు మాత్రమే పరిమితం అవుతున్న వెబ్ మాసపత్రిక. అనువాద సాహిత్యం ఎప్పుడూ మన సాహిత్యాన్ని సుసంపన్నం చేస్తుంది. ఇతర భాషల్లో వచ్చే గొప్ప రచనలను చదవడం వల్ల మన సాహిత్యకారుల, చదువరుల ఆలోచన విస్తృతి కూడా పెరుగుతుంది. అందువల్ల కేవలం అనువాద సాహిత్యానికి మాత్రమే ప్రత్యేకమైన వేదిక కల్పించే లక్ష్యంతోనే kathavasudha.com పనిచేస్తుంది.

ఇప్పుడున్న సాహిత్య పత్రికలు website/ text ఫార్మాట్‌లో ఎక్కువగా అందుబాటులో ఉన్నాయి. కొందరు pdf book/flipbook రూపంలో అందిస్తున్నారు. ‘కథావసుధ తెలుగు అనువాద సాహిత్య మాసపత్రిక’ ఈ రెండు ఫార్మాట్లలోనూ పాఠకులకు అందుబాటులో ఉంటుంది. వెబ్‌సైట్ లో టెక్ట్స్ ఫార్మాట్‌లో అందరూ చదువుకోవచ్చు. ప్రతినెల మొదటి తేదీన సంచిక విడుదల అవుతుంది. 20వ తేదీన ఫ్లిప్ బుక్ అందుబాటులోకి వస్తుంది. దానిని పాఠకులు పీడీఎఫ్ పుస్తకంగా డౌన్లోడ్ చేసుకోవడానికి కూడా వెసులుబాటు ఉంటుంది. కొన్ని వెబ్ పత్రికలు text రూపంలో మాత్రం, కొన్ని flipbook రూపంలో మాత్రం ఇస్తుండగా ‘కథావసుధ తెలుగు అనువాద సాహిత్య మాసపత్రిక’ మాత్రం ఈ రెండు ఫార్మాట్లను మేళవించి పాఠకులకు అందిస్తుంది.

మా ఉద్దేశం.. అనువాద తెలుగు సాహిత్యానికి మన శక్తిమేర వ్యాప్తి కల్పించడం మాత్రమే. అందుకే ‘కథావసుధ’ వెబ్‌సైట్‌లో ఇతర ఆన్‌లైన్ సాహిత్య పత్రికలన్నింటి చిరునామాలను కూడా లింక్‌ల రూపంలో ఇస్తున్నాం. చదవడం ఇష్టమైన వాళ్లు ‘కథావసుధ తెలుగు సాహిత్య మాసపత్రిక’తో పాటు వాటన్నింటినీ కూడా చదవండి.. సాహిత్యాన్ని ఆస్వాదించండి. సాహిత్యం మాత్రమే కాదు, భాష కూడా సజీవంగా ఉండాలంటే.. చదివే ఇష్టం ఉన్న ప్రతిఒక్కరూ చదవడాన్ని ఆపకపోవడమే మార్గం. మనం చదవడంతో పాటు, మరొకరికి చదవడాన్ని అలవాటు చేయడం ముఖ్యం. తమకు నచ్చిన ప్రతి దానినీ తామెరిగిన పదిమందికీ షేర్ చేసి అందరితోనూ చదివింపజేయడం అవసరం. ఇలా చదివే అలవాటు ఒకరినుంచి మరొకరికి అంటుకుంటూ ఉంటే.. ఆధునిక ధోరణలు, సాంకేతిక విప్లవాలు కొత్త పుంతలు తొక్కుతున్న తీరులోనే.. తెలుగు సాహిత్యం కూడా.. మరింత సమృద్ధంగా, సముజ్వలంగా మారుతుంది.

ఆదరించి ప్రోత్సహిస్తారని ఆశిస్తూ.. కృతజ్ఞతలతో..

.. కె.ఎ. మునిసురేష్ పిళ్లె
సంపాదకుడు, 99594 88088