ఆంగ్ల మూలం: సమ్రీన్ సాజెదా
తెలుగు సేత: మందరపుహైమవతి
ఉన్మాదపు పరుగులు తీస్తూ
సుడులు తిరుగుతున్న దుమ్ము
కర్కశపాదాలు రేపుతున్న ధూళి
నడుస్తున్న వాస్తవాలకు దూరంగా
ఒక ప్రాచీన మహా సంస్కృతి
జ్ఞాపకాలను ధ్వంసం చేస్తూ
ఆ కాళరాత్రిలో సమస్తాన్నీ కాలరాస్తూ
సుడులు తిరుగుతున్న ధూళి
చెదరినగూడుకు చేరిన పిచ్చుకలా
అస్థిరంగా
కనుచూపు మేరలో ఆహారం దొరకని
అసహనపు కుక్కలా
కమ్ముకున్న ధూళిలో
ఉక్కిరిబిక్కిరౌతున్న దేశం
అమాయకత్వపు
మెరుపుల ముసుగు తొడుక్కుని
నెమ్మదిగా
మరింత నెమ్మదిగా
మళ్ళీ లేస్తుంది దుమ్ము
అశాంతిపరుడైన కవిలా
ఆగకుండా
శత్రువులను ఆగనివ్వకుండా
Discussion about this post