పంజాబీ మూలం: అవతార్ సింగ్ సంధూ “పాశ్”
అనువాదం: ఆర్.శాంతసుందరి
అన్నిటికన్నా ప్రమాదకరం
శ్రమ దోపిడీ కాదు
పోలీసుల లాఠీ దెబ్బలు కావు
దేశద్రోహం లంచగొండితనం కావు
నేరం చెయ్యకుండా పట్టుబడడం విషాదమే
భయంతో నోరు మూసుకోవడం తప్పే
కానీ అవేవీ అన్నిటికన్నా ప్రమాదకరం కావు
మోసాల హోరులో
నిజాయితీ గొంతు అణిగిపోవడం అన్యాయమే
మిణుగురుల వెల్తురులో చదువుకోవడం తప్పే
పిడికిళ్ళు బిగించి కాలం గడిపెయ్యడం సరికాదు
కానీ అన్నిటికన్నా ప్రమాదకరం మాత్రం కాదు
అన్నిటికన్నా ప్రమాదకరం
జీవచ్ఛవంలా ఉండిపోవడం
దేనికీ తల్లడిల్లకుండా అన్నీ భరించడం
ఏమీ జరగనట్టు
ఇల్లు వదిలి పనికి వెళ్లడం
పని ముగించుకుని మళ్ళీ ఇల్లు చేరడం
అన్నిటికన్నా ప్రమాదకరం
మన కలలు మరణించడం
అన్నిటికన్నా ప్రమాదకరం
మీ చేతికున్న గడియారం పనిచేస్తున్నా
మీ దృష్టికి అది ఆగిపోయినట్టు కనిపించడం
అన్నిటికన్నా ప్రమాదకరం
అన్నీ చూస్తూ కూడా నిశ్చలంగా ఉన్నట్టుండే కన్ను
ప్రపంచాన్ని ప్రేమగా చుంబించడం మర్చిపోయిన ఆ చూపు
వస్తువుల నుంచి వెలువడే ఆవిరిమీద జారిపోయే ఆ చూపు
రోజువారీ పనులలో మునిగిపోయి
ఏ లక్ష్యమూ లేని ఒక అయోమయంలో దారి తప్పుతుంది
ప్రతి మారణకాండ తర్వాత
శూన్యమైన ఆవరణ మీది ఆకాశంలో ఉదయించి
మీ కళ్ళని కారంలా మండించని
ఆ చందమామ చాలా ప్రమాదకరమైనది
మృతుల గురించి శోక గీతంగా మారి
మీ చెవులకి సోకే పాట
భయకంపితులైన వారి గుమ్మాలలో
గూండాలా విర్రవీగే పాట
అన్నిటికన్నా ప్రమాదకరం
బతికున్న ఆత్మల ఆకాశంలో
పొద్దువాలే రాత్రి
శాశ్వతంగా మూసుకున్న
చీకటి తలుపులకీ గడపలకీ అతుక్కునే
గుడ్లగూబలు నక్కలూ అరిచే ఆ రాత్రి
అతి ప్రమాదకరమైనది
ఆత్మ సూర్యుడిలా అస్తమించే ఆ దిక్కు
వేడి కోల్పోయిన ఆ ఎండలో ఒక ముక్క
మీ ఒంటి తూర్పు దిక్కున గుచ్చుకోవడం
అన్నిటికన్నా ప్రమాదకరం
అంతేగాని
అన్నిటికన్నా ప్రమాదకరం
శ్రమ దోపిడీ కాదు
పోలీసుల లాఠీ దెబ్బలు కావు
దేశద్రోహం లంచగొండితనం కావు































