ఆంగ్ల కవితలు : ఓ. హెన్రీ
తెలుగు అనువాదం : బొల్లిముంత వెంకట రమణా రావు
పాత పొలం
ఈ వేళ ఆపిల్ చెట్లపై
తెల్లని పూలు విచ్చుకుని మెరుస్తుంటే,
కొత్తగా మొలిచిన పచ్చిక
నేలపైకి నెమ్మదిగా పాకివస్తుంటే,
గాలిలో వసంతపు పరిమళం
మృదువుగా తేలుతుంటే—
వెలిగించిన పైపును ఆస్వాదిస్తూ,
చేతిలో నిండుగా ఉన్న గ్లాసుతో,
నేను మా పాత పొలం గురించి
కలలు కంటున్నాను.
మెల్లగా నవ్వుకుంటూ,
కళ్లముందు ఆ దృశ్యం
నిజంగానే కనిపిస్తున్నట్టుగా—
మా పాత ఇంటి పొలాలపై
ప్రకాశవంతమైన సూర్యుడు
తన వెలుగును కురిపిస్తున్నాడు.
ఆవులకు పాలు పితికిన రోజులు,
లోతట్టు మైదానాల నుంచి
ఎండుగడ్డిని మోసుకొచ్చిన రోజులు,
నాగళ్ల వెంట నడుస్తూ
పొలంలో సాళ్లు దున్నిన రోజులు,
పత్తి మొక్కలు ఏపుగా పెరగాలని
వాటి చుట్టూ మొలిచిన కలుపును
కొడవలితో తొలగించిన రోజులు—
అన్నీ జ్ఞాపకమవుతున్నాయి.
అయినా,
ఆ రోజులను తలచుకుంటూ
ఇక్కడే కూర్చుని కలలు కనడం,
మెల్లగా నవ్వుకోవడం,
కళ్లముందు ఆ పొలాన్ని
నిజంగానే చూస్తున్నట్టుగా ఉండడం—
అదే నాకు ఇష్టం.
మా పాత పొలాలపై
వేసవి ఎండ
బంగారు కాంతిని చల్లుతూ
ధగధగ మెరుస్తున్నట్టుగా—
ఆ దృశ్యాన్ని తలచుకుంటూ
ఇక్కడే కలల్లో మునిగిపోవడం.
జోలపాట బాలుడు
అదే పాత బాణీలో
జోలపాటగా పాడే ఆ బాలుడు—
జూన్ తొలిరోజుల్లోనే చనిపోవాలనే
తన డప్పునూ బొమ్మలనూ
వదిలేసే ఆ బాలుడంటే
ప్రజలకు ఎంతో ఇష్టం.
కానీ, కాస్త కొత్తదనం కోసం,
ఈసారి మాకు ఒక పాట పాడండి—
కాలి వేళ్లు నొప్పితో ఉన్నా
చురుగ్గా తిరిగే ఆ బాలుడి గురించి;
ముఖమంతా మచ్చలతో,
మొరటుగా,
అందవిహీనంగా,
చెడుగా ఉండే ఆ బాలుడి గురించి—
ఎంత చేసినా
చావడానికి మాత్రం ఒప్పుకోని,
మొండిగా బతికే
ఆ బాలుడి గురించి.
ఓ. హెన్రీ — జీవిత పరిచయం
ఓ. హెన్రీ (O. Henry) అనే కలం పేరుతో ప్రసిద్ధి చెందిన అమెరికన్ రచయిత అసలు పేరు విలియం సిడ్నీ పోర్టర్ (William Sydney Porter). ఆయన 1862 సెప్టెంబర్ 11న నార్త్ కరోలినాలోని గ్రీన్స్బరోలో జన్మించారు. చిన్నతనంలోనే తల్లిని కోల్పోయి, మేనత్త సంరక్షణలో పెరిగారు. విద్య పూర్తయ్యాక ఫార్మసీలో పనిచేశారు. తరువాత టెక్సాస్కు వెళ్లి వివిధ ఉద్యోగాలు చేస్తూ రచనలు ప్రారంభించారు. అక్కడి సామాన్య ప్రజల జీవితం, వారి కష్టాలు, ఆశలు, హాస్యభరితమైన సంఘటనలు ఆయన రచనా దృష్టిని ప్రభావితం చేశాయి. ఆర్థిక అవకతవకలకు సంబంధించిన కేసులో జైలు శిక్ష అనుభవించిన సమయంలో కూడా రచన కొనసాగించారు. జైలు నుంచి విడుదలైన తరువాత న్యూయార్క్లో స్థిరపడి విస్తృతంగా రచనలు చేశారు. The Gift of the Magi, The Last Leaf, The Ransom of Red Chief, The Cop and the Anthem, After Twenty Years వంటి కథలు ఆయనకు విశేష ఖ్యాతిని తెచ్చాయి. అనూహ్యమైన ముగింపులు, హాస్యం, వ్యంగ్యం, మానవత్వం, ప్రేమ, త్యాగం ఆయన కథలలో ప్రధానంగా కనిపిస్తాయి.
ఓ. హెన్రీ కేవలం ప్రసిద్ధ చిన్నకథా రచయిత మాత్రమే కాదు; కవి కూడా. కవితలు, హాస్యరచనలు, వ్యాసాలు కూడా రాశారు. The Old Farm, The Lullaby Boy, Drop a Tear in This Slot వంటి కవితల్లో ఆయనకు సహజమైన హాస్యం, చమత్కారం, వ్యంగ్యం, జీవితాన్ని సూక్ష్మంగా పరిశీలించే దృష్టి కనిపిస్తాయి. కథల్లో సామాన్య మనుషుల జీవితాలను ఆప్యాయంగా చిత్రించినట్లే, ఆయన కవితల్లోనూ రోజువారీ జీవితంలోని చిన్న సంఘటనలను సున్నితమైన హాస్యంతో, కొన్నిసార్లు విషాద ఛాయలతో వ్యక్తం చేశారు. ఓ. హెన్రీ 1910 జూన్ 5న న్యూయార్క్లో మరణించారు.
