తెలుగు అనువాదం : పారనంది నిర్మల
జ్ఞాపకం
మూలం: పి.కే.పారక్కటవు
ట్రాఫిక్ జామ్ వల్ల అతడు కారు ఆపు చేయాల్సి వచ్చింది. అప్పుడే అతడి దృష్టి ఒక స్త్రీ మీద నిల్చింది. ఆమె బస్సుకోసం బస్సు స్టాప్ లో నిల్చుని ఉంది. ఆమెను ఎక్కడో చూసినట్టు అతనికి అనిపించింది. ఆమె ఎవరు?
ఒక్క క్షణం ఆలోచిచంాడు. జామ్ తొలగింది. జనసమూహం కదిలింది. అతడు కారు స్టార్ట్ చేసి ముందుకు సాగాడు. కాని మనసు ఇంకా ఆమె గురించే ఆలోచిస్తూంది. ఎంత ఆలోచించినా ఏమీ గుర్తు రావడం లేదు. ఆమె ఎవరై ఉంటుంది?
అతడు ఇంటికి వచ్చాడు. కారును గ్యారేజ్ లో పెట్టి ఇంటి లోపలకి వెళ్లాడు.
అకస్మాత్తుగా అతడికి జ్ఞాపకం వచ్చింది. వోహ్! ఆమె తన తల్లే అని!
దుస్తులు
మూలం: శ్రీరాజు కుప్పాయుగళ్
నల్ల దుస్తులన్నాయి- న్యాయం నాలో ఇమిడి ఉందని
తెల్ల దుస్తులన్నాయి- జీవితమే మాలో ఇమిడి ఉందని
ఖాకీ దుస్తులన్నాయి- క్రమశిక్షణ మాలో ఇమిడి ఉందని
ఖద్దరు దుస్తులన్నాయి- దేశభక్తి మాలో ఇమిడిఉందని
అంతా విన్నాక దుస్తులు లేని ఒక దరిద్రుడి ఎండిపోయిన తోలు ఇలా ఛీత్కరించింది-
నేనేమీ వేసుకోను. ఈ శరీరాన్ని బట్టల్లేకుండా మాడమంటూ ప్రపంచానికి వదిలేస్తాను.
అప్పుడు ముఖం తిప్పుకొని వెళ్లిపోతున్న జన సమూహం ‘ఔను ఔను’ అంది.
వర్షం
మూలం: పి.కె. పారక్కటువు
దాహంతో పోతోందనిపించినప్పుడు అతను తన ఆప్తమిత్రుడితో అన్నాడు- ‘‘కాస్త స్నేహం..!’’
మిత్రుడన్నాడు- ‘‘మిత్రమా! ఈ భూమి ఎండిపోయింది. ఆకాశం కూడా ఎండిపోయింది. ఈ కరువు కాలంలో దాహంతోనే ఈ భవసాగరాన్ని ఈదాలి.
ఆ తరువాత అతడు కూతురుతో- ‘‘కొంచెం మంచినీళ్లు..’’ అని అడిగేడు. అప్పుడు జవాబుగా ఆమె, ‘‘నాన్నగారు, పాపం పుణ్యం అనే నమ్మకాలు పాతపడిపోయాయి. కోరికలు లేని ఆ ప్రపంచంలో ఏ విధమైన కోరిక లేకుండా మీరు పయనించండి’’ అనేసి తన స్నేహితునితో బైటకి వెళ్లిపోయింది.
అప్పుడు ఆయన ఆకాశం వైపు దీనంగా చూస్తూ యాచించాడు- ఒక నీటిబొట్టు..
ఆయన కోరిక పైకి ఆవిరై ఎగసిపోయి మేఘమై ఆకాశంలో నాట్యమాడటం మొదలెట్టింది. అది చూసి సంతోషంతో కాలం అనే ఆకాశం దయ అనే తలుపు తెరిచింది. ఇంకేముంది ధారా ప్రవాహంగా వర్షం కురిసింది.
కాలం
మూలం : కుంజున్ని
రేపు ఈ సంసారం నాశనమైపోతుంది. అందుకు అది నాశనమైన తరువాత నింపాదిగా కథ రాసి పంపుదామనుకున్నాను. ఈ రోజు పంపితే ఈ జన కోలాహలం గందరగోళంలో పడి చేరుతుందో లేదో? మీరు బహుశా ఆశ్చర్యపోతున్నారు కదూ!
ఈ ప్రపంచమే లేనప్పుడు కథ ఎలా రాస్తానని.
ఇందులో ఆశ్చర్యపోవడానికేముంది? కథ రాయడానికి ప్రపంచముండాలా?
అక్కరలేదు. కథకాలం బట్టి రాయబడుతుంది. రేపు కాలం అంతం అవుతుందని ఏ జ్యోతిష్కుడు అనలేదు కదా!!
జర్నలిజం, సాహిత్యం రంగాల్లో ముప్ఫయి అయిదేళ్ల అనుభవం. ప్రచురణల రంగంలో సుదీర్ఘ అనుభవం. కథలు, కవితలు, వ్యాసాల ఎంపిక, వెబ్ మేగజైన్ సంపాదకత్వ బాధ్యతలు.
