గోధుమ

హిందీమూలం : డా. కైలాశ్ వాజపేయి
తెలుగు అనువాదం : పారనంది నిర్మల

ఓ నా జన్మదాతా!
నేను నిండు పాలుతోనున్న
పచ్చని గోధుమని
నేను పండినప్పుడు
నా యీ శరీరం
రొట్టెగా తయారైనప్పుడు
నేను ఏ తాగుబోతు కడుపులోకో
లేక
ఏ భోగేచ్ఛ కలవాడి
ప్రేగులోకో వెళ్లకూడదు
ఇదే నా కాంక్ష.

అలసిపోయిన నిర్భాగ్యుణ్ని..
మండుతున్న కొలిమిలాంటి పొట్టలో
స్వాహా అవుతూ తృప్తి పడ్డ స్వరంతో
కూని రాగం తీస్తుండాలి.
ఆ మోక్షమే
నిజమైన మోక్షం అవుతుంది
నా బంగారు వికాసానికి!

గోవు

నీ పచ్చికని చేజిక్కించుకున్నాము
వదిలేశాము రోడ్ల మీద నిన్ను..
చెత్త చెదారం, వార్తాపత్రికలు, ప్లాస్టిక్ ముక్కలు మేయడానికి..
పీల్చేశాము నీ పాలని..
క్రోమ్ జోళ్లు తయారీకి,
నీ దూడ పనికొచ్చింది!
జిహ్వచాపల్యం గల వాళ్లము
రుచికోసమో లేక లోభంతోనో
ఏదో వధశాలలో అర్ధరాత్రివేళ
నిన్ను కోసేశాము
మమ్మల్ని బాధిస్తూంది ఒకే దుఃఖం
ఈ రోజు వరకూ వాడుకోలేకపోయాము..
నీ మౌన ఛీత్కారాన్ని
మమ్మలని క్షమించు తల్లీ
బజారులో నిట్టూర్పులకి
విలువలేదు

ఎడిటర్

జర్నలిజం, సాహిత్యం రంగాల్లో ముప్ఫయి అయిదేళ్ల అనుభవం. ప్రచురణల రంగంలో సుదీర్ఘ అనుభవం. కథలు, కవితలు, వ్యాసాల ఎంపిక, వెబ్ మేగజైన్ సంపాదకత్వ బాధ్యతలు.