కెనడా ఆదివాసీ కవి : Chief Dan George
అనువాదం : హిమజ
వృక్షాల గంభీరమైన అందం,
గాలిలోని సన్నని మృదుత్వం,
గడ్డి వీచే కమ్మని పరిమళం —
నాతో మాటలాడతాయి.
ఎత్తయిన పర్వత శిఖరాలు
అల్లన ఆకాశపు గర్జన,
సముద్రపు హోరు వేసే తాళం —
నాతో కలిసి పలుకుతాయి.
నక్షత్రాల నిశ్శబ్ద కాంతి,
ప్రభాతపు తాజాతనం,
పువ్వులపై మెరిసే తుహిన బిందువులు —
పిలిచి నాతో మాట్లాడతాయి.
అగ్నిలోని బలం,
సాల్మన్ చేప రుచి,
సూర్యుని ప్రయాణపు చలనం
ప్రకృతిలో నిరంతరం
కొనసాగే ప్రాణ తత్త్వం.
అన్నీ నాతో పలుకుతాయి.
అప్పుడిక
నా హృదయం ఉల్లాసమై
నింగి వైపు ఎగిసిపోతుంది.!!
Discussion about this post