ఆంగ్ల కవిత: A Home Song -Henry Van Dyke
తెలుగుఅనువాదం : హిమజ
ఒక కవి రాసిన పుస్తకంలో
నక్షత్రంలా మెరిసిన ఒక వాక్యాన్ని చదివాను—
“రాతి గోడలు ఉన్నంత మాత్రాన
అది చెరసాల కాదు;
ఇనుప కమ్మీలు ఉన్నంత మాత్రాన
అది పంజరం కాదు.”
అవును, అది నిజమే.
కానీ ప్రయాణాల్లో, అనుభవాల్లో
నేను మరో సత్యాన్ని కూడా తెలుసుకున్నాను—
పాలరాతి నేలలు,
బంగారు మెరుపులతో నిండిన గోడలు,
వైభవంగా నిలిచిన భవంతులు…
ఇవేవీ కలిసి
ఒక ఇంటిని ‘గృహం’గా మార్చలేవు.
ప్రేమ నివసించే చోట,
స్నేహం ఆత్మీయ అతిథిగా వచ్చే చోట,
ఆ ఇల్లు ఎంత సాధారణమైనదైనా
అది నిజమైన గృహమే.
ఎందుకంటే అక్కడ
మనసుకు ఒక ఆసరా ఉంటుంది;
అలసిన హృదయానికి
ఒక ప్రశాంతమైన విశ్రాంతి దొరుకుతుంది.
అదే నిజమైన ఇల్లు …
అదే మనసు తలదాచుకునే చోటు.
“A Home Song”
ఈ ఆంగ్ల కవిత రచయిత Henry Van Dyke .ఆయన అమెరికాకు చెందిన కవి, రచయిత, విద్యావేత్త,
మతబోధకుడు. ప్రేమ, ప్రకృతి, మానవ విలువలు వంటి అంశాలపై అనేక కవితలు, వ్యాసాలు రచించారు.
2005 నుండి కవిత్వం రాస్తున్నారు, ‘ఆకాశమల్లె’, ‘సంచీలో దీపం’ వీరి కవితా సంకలనాలు. తాజాగా అఫ్రో అమెరికన్ కవయిత్రి మాయా ఏంజిలో కవితల అనువాదం పుస్తకంగా వచ్చింది. సంచిక అంతర్జాల పత్రికలో “పొయెట్స్ టుగెదర్” శీర్షికతో భిన్న కవుల విభిన్న కవిత్వాన్ని అనువదించి అందించారు.
సిసి రెడ్డి గారి ‘మనభూమి’మాసపత్రికలో ‘హిమశకలం’ పేరుతో సంవత్సరం పాటు కాలమ్ నిర్వహించారు. ‘భూమిక’ స్త్రీవాద పత్రిక లో పద ప్రహేళిక నిర్వహించారు. శ్రీమతి సుశీలా నారాయణరెడ్డి కవయిత్రి తొలి ప్రోత్సాహక పురస్కారం, రొట్టమాకు రేవు అవార్డు, అమృతలత అపురూప అవార్డు, తెలుగు విశ్వ విద్యాలయం వారి కీర్తి పురస్కారం, కలేకూరి ప్రసాద్ స్మారక అనువాద పురస్కారం- అందుకున్నారు.
‘రెండు సంతకాలు‘ త్వరలో రానున్న కవితా సంకలనం
ప్రముఖ కవి రాజేందర్ జింబో హిమజ జీవన సహచరులుగా హైదరాబాద్లో నివాసం ఉంటున్నారు.
