ఇంగ్లీష్ మూలం: మాయా ఏంజిలో
తెలుగు అనువాదం: మందరపు హైమవతి
చేదైన అబద్దాలతో
నా గురించి నీవు
చరిత్ర పుటలలో రాయచ్చు
నన్ను నీవు దుమ్ములో మురికిలో ముంచేయవచ్చు
ఐనా నేను ఆ ధూళి మేఘంలా పైకి లేస్తాను
నా గడుసుదనం తెలివితేటలు నిన్ను కుంగదీశాయా
నా దగ్గరేవో బంగారు నిధులున్నట్లు
నా ఆత్మస్థైర్యపు అడుగులు చూసి
నిరాశలో చీకటిలో ఎందుకు మునిగిపోయావు
జ్వలించే సూర్యునిలో
ప్రకాశించే చంద్రునిలో
ఉవ్వెత్తున ఎగసిపడే తుఫాను గాలిలా
నేను మళ్లీ శిరసెత్తుతా
నా తలను వంచుకొని
నా కనులు దించుకొని
జారి పడుతున్న కన్నీటి బిందువుల్లా
నా భుజాలను కుంచించుకొని కుమిలిపోవాలా! కుంగిపోవాలా!
ఏడ్చిఏడ్చి
సొమ్మసిల్లి పోవాలా!
ఐనా నేను ఉదయిస్తాను
ఆశాగ్నికణంలా
ఆత్మగౌరవ పద్యంలా
స్త్రీవాద కవయిత్రి. మూడు దశాబ్దాలుగా రాస్తున్నారు. బాల్యం నుంచి కవిత్వం రాస్తున్నారు. సూర్యుడు తప్పిపోయాడు, నిషిధ్ధాక్షరి, నీలి గోరింట, రాతి చెయ్యి కవితా సంపుటాలు.. వానచినుకులు వ్యాస సంకలనం ప్రచురించారు. ఫ్రీవర్స్ ఫ్రంట్ బహుమతి, నారాయణ రెడ్డి, శ్రీకాంత్ శర్మ అవార్డులు, తెలుగు యూనివర్సిటీ అవార్డు వచ్చాయి. ఆంధ్రప్రదేశ్ ప్రభుత్వ ఉగాది పురస్కారం సహా పదివరకు పురస్కారాలు లభించాయి. ఇంగ్లీషు, హిందీ, కన్నడ, తమిళ, మళయాళ, బెంగాలీ లలోకి ఆమె కవితలు అనువదించబడ్డాయి.
