ఆంగ్లం: Ms Sylvia Plath ‘Mirror’
తెలుగు అనువాదం : ముద్దు వెంకట లక్ష్మి
స్వచ్ఛమైన వెండిపళ్ళెంలా తళతళా మెరిసే అద్దాన్ని ;
ఎట్టి పక్షపాతమూ ఎటువంటి తారతమ్యాలూ
లేని దాన్ని ,
ఎవరిని గూర్చీ ముందస్తు అభిప్రాయాలు ఏర్పరచుకోను ;
ఎదుటికి వచ్చిన ఏ వస్తువునైనా
ఎవరినైనా యథాతథంగా ప్రతిబింబిస్తాను ,
భగవంతునిలా సర్వులనూ సమాన దృష్టితో ఆదరిస్తాను,
రాగద్వేషాలు, ఇష్టాయిష్టాలు లేనిదాన్ని ;
రోజంతా నాకెదురుగా ఉన్న
తెల్లటి గోడనూ, గోడపైనున్న గులాబీరంగు మచ్చలనూ
తదేకంగా చూస్తూ కాలం గడుపుతుంటాను,
రాత్రైతే చీకటి మమ్మల్ని వేరుపరుస్తుంది ;
ఇప్పుడు నేనొక పెద్ద తటాకాన్ని!
ప్రతి దినం ఉదయాన్నే నడివయసు దాటిన
ఒక మహిళ వచ్చి నాలో తన ప్రతిబింబం చూసుకుంటుంది ;
ఆమె జీవితంలో నేనొక ముఖ్యాతిముఖ్యమైన భాగాన్ని ,
ఆవిడ నా నీటి తరగలలో తన ప్రతిరూపాన్ని
చూసుకున్నప్పుడల్లా తీవ్ర అసంతృప్తికి లోనౌతుంది,
నేనేం చెయ్యను?!
సత్యము తప్ప అన్యము
తెలియనిదాన్ని,
క్రొవ్వొత్తుల్లా, వెన్నెల నీడల్లా
ఆమె సౌందర్యాన్ని మాయదారి రంగులలో చూపలేను ;
ఆమె తన కనురెప్పలను అల్లల్లాడిస్తూ,
ఆందోళనతో చేప పిల్లలా చేతులను తిప్పుతూ,
నా నీటి లోతుల్లో కాలగమనంలో
కనుమరుగైన తన యౌవన కాంతుల్ని,
కోల్పోయిన తన అందచందాలనూ వెతుక్కుంటూ ఉంటుంది.
విశ్రాంత ఆంగ్ల అధ్యాపకురాలు, ఆంధ్రా ఎడ్యుకేషన్ సొసైటీ, న్యూఢిల్లీ.
పాఠశాలలో, కళాశాలలో రచనా వ్యాసంగం మొదలుపెట్టినా, ఉద్యోగరీత్యా ఢిల్లీ లో ఉన్నప్పుడు శ్రీవారు , సహోద్యోగుల ప్రోత్సాహంతో అక్కడి తెలుగు సాహిత్య, సాంస్కృతిక సంస్థల్లో సభ్యత్వం తీసుకుని కవితలూ, వ్యాసాలు వ్రాసేవారు. పదవీ విరమణ తర్వాత కవితలు, సమీక్షలు, వ్యాసాలు వ్రాస్తున్నారు.
వృత్తిలో ఉత్తమ అధ్యాపకురాలు, ప్రవృత్తి రీత్యా తెలుగు వెలుగు, కలం రత్న సహస్రాధిక కవితా సమీక్షావిభూషణ, కవన కిరణం, కీర్తిరత్న మొదలైన పురస్కారాలు, బిరుదులు లభించాయి.
ప్రస్తుతం తెలుగు లో పిహెచ్ డి ప్రవేశ పరీక్ష ఉన్నత స్థాయిలో ఉత్తీర్ణురాలై, మౌఖిక పరీక్ష ఫలితాల కోసం ఎదురు చూస్తున్నారు.
బెంగుళూరు లోని కర్ణాటక తెలుగు రచయితల సమాఖ్య కు ఉపాధ్యక్షురాలు, పిఠాపురం లోని పురుహూతికా లలితకళా పరిషత్తు కు సాహితీ కార్యదర్శి గా సేవలందిస్తున్నారు.
పరిచయంలో వ్రాయడం మర్చిపోయాను –
మూడు వచన కవితాసంపుటులు.. 1 కవన సవ్వడులు 2 భావనా కుసుమాలు 3 గౌతమి తరంగిణి, ఒక వ్యాస సంపుటి- వ్యాస మంజరి ప్రచురించారు.
